الشاعر علي الاحمد http://www.ali-alahmad.com/ :

:

للـ مفعمه .. اجمل بنات الكون بعيون الجميع

********** للـ سيده ارقى الاناث الصاخبه موت وضياع

ترقص قصيدة حب موسومه على خد الربيع

********** متغلفه بالبرد واحساس النقايض والصراع

ماجيت شاريها وانا ناوي معا الفرقا ابيع

********** بس جيت اعلمها سواليف المجاعه والجياع

ولا جيت احمل حبرها ذنب البروده والصقيع

********** دام انـ قلبي شب فيـ دمـه ومحسوبه شجاع

اصب من حزني فناجيل المراجل للرضيع

********** واقول سم ولا على بالي حنينه للرضاع

حزني سبال ولا على يمناي بالمده رجيع

********** لو هز فنجاله وقال اكرم فلايمكن يطاع

مادامه الا في حمى اضلاعي وكاد انه منيع

********** دونه مسيرة حرب لايمكن يسطرها نزاع

يالغاليه لولاي اخاف اكتب معاناتي واضيع

********** وتصير عرضه والحكي غايه تـ ّجر الاستماع

لـ اقول احبك لين احس القلب من ذكرك يميع

********** واخاف اشيلك واودعك عيني وتصبح لي قناع

شفني كذا بصمتك توايقني وانا كني صريع

********** وشلون لو رحتي وقلتي يا \"علي\" هذا وداع

أي والله اني اعشقك ديره واخاف انك تضيع

********** واقسى شعور اني معك موطن واشعر في ضياع

: http://www.ali-alahmad.com/