الشاعر علي الاحمد http://www.ali-alahmad.com/ :

:



ياقبلة الطرق وملاذ الغاوي اللي به مجون

******************** ياسلسبيل العشق اسمع ماقصدت بجارتـك



ماحرم الله نـظرتي الاولى ولاهمـ يحزنـون

******************** ان شلت عيني احـسبه ذنـب ٍ قتل كـفارتـك



تاره وانا اسمع بالحكم من قال هونها تهون

********************* ياشيييخ وش تاره وش اللي مابقى في تارتك



ان سولفت عيـني لقلبي عن تـفاصيلك امـون

********************* اقسـم بربي ياحـروفي وقـفت واحـتارتـك



نوبه الا مني مشيت بــ شـارعك جن الجنـون

********************* امـوت غيـره من شـوارع ديـرتك مع حارتـك



كن الرموش اللي تحـف العين مسـرح بالفنـون

********************* معذور لو بشرب قـدح ريـقك وانا بخمارتـك



(شاقي) على الموضه تقص الشعر حظك يالمتون

********************* يـاوالله انـي صـرت شـاقي لالمـس نظارتـك



كني على مسـرح جـمالك يااكـون او لااكـون

********************* زود ٍ على ناي الجروح استـطربت قيثارتـك



جيت ادعي الله وارتحل عنك عسى جرحي يهون

********************* سبـحان من سـخـر لنا هـذا وانـا بطـيارتـك



يـادرة ٍ مـكنـونـة ٍ بيـن العيـون وهالجفـون

********************* لامـن طلـعـتي عـزة اللـه ازعـلـت محارتـك



مـاودها غـير انها تخـفيك عـن كل العيـون

********************** القلب لك (قنصل) وعيني موكب ٍ بـ سـّفارتك



كلك كذا هيبه وحشمه لابسه درع الطعون

********************** معصومة ٍ من كل جرح ٍ لانـوى في غارتـك



بس اقدحي جمر الهبيل اللي تغربل بالظنون

********************** مره على كاسك ثمل يوم ان صحت سيجارتك


:

: http://www.ali-alahmad.com/